Ástin

Maður minn gaf mér How to make friends með FM BELFAST í jólagjöf. Ég gaf honum Hvernig gerir þú konuna þína hamingjusama eftir Þorgrím Þráinsson.

Ég er núna að hlusta á FM BELFAST við vinnuna. Ég veit að Þorgrímur Þráinsson er enn í plastinu.

Þrátt fyrir að FM BELFAST sé hressandi í morgunsárið er ég ekki enn orðin hamingjusöm.

Partýljónið ég

Þegar ég hafði unnið á stöðinni í mjög stuttan tíma var ég skipuð í árshátíðarnefnd. Ég kunni ekki við að segja þeim að sjálf myndi ég mæla með einhverjum öðrum, bara hverjum sem er. Síðustu daga hef ég reynt að koma á svona partýstemmningu á kaffistofunni fyrir árshátíðina, sem er annað kvöld. Þetta hefur átt að vera svona upphitun. Ég á ekki von á að vera beðin um að vera í árshátíðarnefndinni á næsta ári.